जागेचं महत्व

आयुष्यात अक्षांश-रेखांशाचं महत्व

आता जास्त जाणवू  लागलंय

योग्य जागेवर असणारे म्हणजे

भाग्यवान असं वाटू लागलंय   II१II

तिकडे रॉकेट्सचा पाऊस पडतोय

जमीन भिजतेय रक्तानं

रडणाऱ्यांचे आक्रोश थांबतायत

उगी राहिल्यानं नाही, तर जीव गेल्यानं II२II

इकडे पाऊस पडतोय धावांचा

खेळाडू भिजताहेत घामानं

लाखभर प्रेक्षक करताहेत गर्जना

स्टेडियम भारलंय  चैतन्यानं   II३II

तिकडं खेडी ओस पडली आहेत

गोळीबाराच्या भीतीनं

तरुण मुलं होताहेत अपंग

राज्यकर्त्यांच्या हट्टानं  II४II

इकडं तरुण चालून गेले

आंतर राष्ट्रीय खेळांसाठी

गोळ्या झाडल्या, भाले फेकले

पण ते पदकं मिळवण्यासाठी   II५II

तिकडे लोक रस्त्यावर उतरतायत

निषेध व्यक्त करण्यासाठी

इथं लोक मिरवणुकी काढतायत

लाडक्या दैवतांच्या सन्मानासाठी  II६II

तिकडं घरदार उध्वस्त झाल्यानं

मुलं देशोधडीला लागतायत

इकडं हातात टिपऱ्या घेऊन

मुलं दांडिया खेळतायत   II७II

माणसं तशीच, रक्त तसंच

डीएनए देखील त्यांचा तसाच आहे

काय कारण असावं  की इकडं  शांती

आणि तिकडं वणवा पेटला आहे?  II८II

पाणी तेच माती तशीच

पण फरक का ? हे कोडं आहे

अक्षांश -रेखांश वेगळे आहेत

एवढाच फरक समजला आहे  II९II

पेराल तसं उगवेल म्हणतात

तिकडं संघर्षाचं पीक आलं आहे

इथं शांतीची बीजं रुजवली गेली

हे आपलं भाग्य  आहे   II १०II

                           २०/१०/२०२३ एकीकडे  रशिया -युक्रेन युद्ध सुरु असतानाच, ७ ऑक्टोबर २०२३ रोजी हमास -इस्राएल युद्ध सुरु झाले. दोन्ही ठिकाणी सैनिकी आणि नागरी जीव हानीच्या क्लेशदायक बातम्या येत आहेत. आपल्याकडे नुकताच गणेशोत्सव मोठ्या थाटात साजरा झाला आणि नवरात्राचा उत्सव जोरात सुरु आहे.  सप्टेंबर-ऑक्टोबर २०२३ मध्ये भारत आणि इतर अनेक देशांमधील तरुण-तरुणींनी  एशियाड खेळांमध्ये भाग  घेतला तर युक्रेन, रशिया, गाझा  पट्टी आणि इस्राएल या ठिकाणच्या तरुण-तरुणींच्या वाट्याला रक्तपात आला.